Maikling Kwento By Manny Ison Batch 1986

Isang dalagang Pilipina si Elena, marikit, maganda at kabigha-bighani ang kaniyang alindog sa kalalakihan. Ngunit sa kabila nito ay mahiyain siya at hindi nagpapaligaw. Matatawag rin natin siyang di-makabasag pinggan sa kaniyang hinhin. Maraming kalalakihan ang sa kaniya'y nanghihinayang. Di niya kasi pinahihintulutang umakyat ng ligaw ang mga ito. Di niya rin pinapansin ang mga lalaking sa kaniy'y bumabati. Nasa edad 23 na si Elena ng mga panahong iyon, tamang edad na sa isang babae upang makapag-asawa. Isang gabi, isang lalaki ang sa kaniya'y nanghimasok, pinasok nito ang kaniyang silid at tinutukan siya ng balaraw sa tagiliran. Sinabi ng lalaki na sundin lang ang kaniyang ipag-uutos ay hindi siya sasaktan. Nakasuot ng "bonnet" ang nasabing lalaki. Sa madaling salita ay pinagsamantalahan siya nito at nailugso ang kaniyang puri. Di halos matanggap ni Elena ang mga pangyayari lalo na'y nagbunga ang kapusukan ng mahiwagang lalaki. Naisumpa niya sa sarili na mapapatay niya ang lalaking lumapastangan sa kaniya. Kinalinga niya ang kaniyang anak na babae sa tulong ng kaniyang mga magulang na noo'y dumamay sa kaniya. Matagal-tagal na panahon na ring kinakalinga niya ang kaniyang anak na anim na taon na ng lumigaw si Alberto sa kaniya. Isang binatang makisig at maamo ang mukha na di matatanggihan ng kahit sinong dalaga.Tumagal ng isang taon ang panliligaw ng lalaki. Tanging si Alberto lamang ang naglakas loob na lumigaw sa kaniya ng mga panahong iyon, sa kadahilanang di na naging maganda ang imahe ni Elena sa mga kalalakihan. Sa madaling salita, nahulog na rin ang loob ni Elena kay Alberto lalo na't naging malapit ang kaniyang anak sa lalaki. Ikinasal sila sa kumbento malapit sa kanilang tirahan. Hindi inalintana ni Alberto ang mga bulung-bulungan ng mga tao patungkol kay Elena. Bago pa man siya ikasal ay ipinagtapat na ni Elena ang mga pangyayari sa kaniyang buhay na di naman naakpetuhan ang pagmamahal ni Alberto sa kaniya. Sa kanilang mag-dadalawang buwang pagsasama ay may ipinagtapat si Alberto kay Elena na ikinagulat ng huli. Sinabi ng lalaki na siya ang taong lumapastangan sa kaniya noong siya ay dalaga pa. Lumabas si Elena at pagbalik ay nakita niya na lamang ang kaniyang kamay na may hawak na patalim at ang matalas na parte nito ay nakabaon sa dibdib ni Alberto. Nagdilim ang isipan ni Elena sa mga pangyayari ng makitang napatay niya si Alberto. Nawala siya sa kaniyang katinuan at sa bahay ng mga baliw siya dinala ng mga kinauukulan. Naiwan ang kaniyang anak na si Lucy sa piling ng mga magulang ni Elena. nang lumaon ay namatay na rin ang mga magulang ni Elena at namuhay mag-isa si Lucy at di na nag-asawa pa.

ARAL: Huwag mong gawan ng isang pagkakamali ang isa pang pagkakamali