Maikling Kwento By Manny Ison Batch 1986

Saudi Arabia, 1995. Tinatahak ni Rolly ang malaking daan patungng Qatif. Galing siya ng Dammam noon sa isang samahan ng mga Pilipino. Dito ay nagkaroon ng inuman at kasayahan sa isang tagong lugar. Batid ni Rolly na bawal uminom sa naturang bansa kaya hindi ito nagpaunlak na uminom ng alak na sadiqi. Alam niyang magmamaneho pa siya kinabukasan. Huminto ito sa isang bakala o grocery upang bumili ng maiinom na orange juice.

"mabuti pa ito safe na at nakadadagdag pa ng lakas ng katawan at nakahahaba ng buhay." wika nito sabay tungga ng juice na nasa babasaging botelya.

Sumakay muli siya ng kaniyang GMC truck pick up na gamit niya sa trabaho bilang technician sa isang malaking kumpanya. Nagtratrabaho na siya rito ng halos tatlong taon. Mabilis ang pagpapatakbo niya ng kaniyang sasakyan habang tumutungga ng juice.

"hmmm sarap talaga ng juice dito sa Saudi, kaya gusto ko rito e" wika nito na sarap na sarap sa iniinom, pagkatungga ay hinahalikan pa nito ang bote.

Nasa kahabaan na siya ng Hi-way ng maubos ang iniinom na bote, inilagay niya ito sa lagayang ng baso sa gitna ng sasakyan malapit sa handbrake. Nakakita siya ng isang ilaw na umiikot ikot mga kalahating kilometro ang layo. Nasabi niya sa sarili ay:

"naku, ambulansiya na naman, siguradong may aksidente na naman at disgrasya"

Papalapit ng papalapit ang ilaw na umiikot, papalapit ng papalapit ito ng mapansin niyang ang ilaw na ito ay headlight ng isang kotse na nagpapaikot-ikot sa kalye gawa ng sandstorm. Mababangga niya ito kung kaya't kinabig niya ang kaniyang manibela. Nakailag siya rito ngunit gumilid siya at mababangga niya naman ang isa pang sasakyan na nakahinto sa gilid na noo'y na ka hazzard light na. Ginamit niya ang preno ngunit hindi ito makapreno sa kadahilanang nakaipit dito ang bote ng Juice na nahulog mula sa kaniyang pinaglagyan dahilan upang sa isang iglap ay sumalpok ito sa nakahintong sasakyan. Nagpaikot-ikot ang sasakyan ni Rolly. Wasak ang unahan nito, bumalandra siya sa buhanginan, Duguan si Rolly ng huminto ang sasakyan. Gumulong ang bote sa loob ng sasakyan patungo sa kaniya na nagkataong dumampi ang labi nito sa kaniyang bibig. Tumulo ang patak ng juice nito na nahaluan ng dugo. Ito ang huling sulyap ni Rolly sa boteng kaniyang pinupuri kani-kanina lamang. Nalagutan na siya ng hininga.